එහෙමද?

දොඩමළුව ඇත්තේ වචන ඇති තැනමද
ඇස අගම පිරුණොත් සංතාප පමණද
බැඳුම සන්තාන ගින්දරක ඇවිලීමද
මදාරා පිපුණොතින් තුසිතේම විතරද…?

---

බොහෝ බර අධික බව
දත් නිසා
හිතවත…

ඔහේ ඔබ අත මතට
නොලමි මා
හදවත….

---

පියාසැරි

පෙමින් සැරිසරා සමනල් සිරස පුරා
සෙමින් පියා විද සුවිසල් අහස අරා
හෙලින් ලිහිණි බැඳුමක රිදුම් විමසලා
තුටින් ගමන් යමි විදසුන් සිතෙහි දරා

---

හමුවීම වෙන්වීම අතර නම් හිමිවීම
නිශ්ඵලය සංසාර දුර්ගයෙහි
පල් වීම
අතැ’ර කල්පෙක දුකට මොහොතවල් ගැලපීම
නතර වී හිඳ ගසක් විඳියි
මල් සුපිපීම